Informe

Cunha periodicidade mínima anual, a unidade que xestiona a aplicación realizará un informe, que lle enviará á comisión de calidade ou ás súas comisións delegadas, sobre as QSP recibidas e tratadas, coa expresión do centro, servizo ou entidade á que se refire cada QSP, o colectivo ao que pertence a persoa reclamante, a materia sobre a que versa e o órgano de resolución. En ningún caso se incluirán os datos das persoas que formularon a QSP nin outro dato de carácter nominativo que puidese afectar a imaxe ou a reputación das persoas.

O reitor/a poderá encomendarlle á unidade que xestiona o sistema a realización de informes extraordinarios por razón da materia, a unidade ou o servizo destinatario das QSP ou outras circunstancias que estime oportuno coñecer. Igualmente, cando a propia unidade que xestiona a aplicación así o considere en atención á natureza do problema, á súa entidade ou á relevancia do seu impacto na comunidade universitaria ou na sociedade, poderá dirixirlle ao/á reitor/a os informes concretos sobre algunha queixa ou suxestión recibida, ou se o número destas sobre unha determinada cuestión así o aconsella.

As unidades dadas de alta na aplicación poden realizar consultas das QSP tratadas na súa unidade segundo os criterios de clasificación e de asignación establecidos no capítulo II.

Os órganos responsables de cada unidade ou servizo analizarán de xeito periódico as QSP rexistradas e o informe anual, co fin de estudar e propoñer accións correctoras dos problemas xerais e medidas de mellora do funcionamento da universidade.

Dado o seu carácter público, o informe anual estará a disposición do público en xeral na páxina web da Universidade de Vigo.