Presentación das queixas, suxestións e parabéns

As QSP rexistraranse nun formulario electrónico ao que se poderá acceder dende todas as páxinas web da Universidade de Vigo. Trátase dun modo de presentación das QSP centralizado, o cal facilita o seu tratamento. As persoas que sexan membros da comunidade universitaria poderán rexistrar unha QSP a través da súa secretaría virtual.

Se un/unha usuario/a presenta a mesma QSP a distintas unidades ou servizos, considerarase como unha única QSP e as restantes arquivaranse segundo o procedemento establecido neste regulamento.

Unha vez respondida a QSP, se se volve presentar por parte da mesma persoa, coa mesma finalidade e ante a mesma instancia, arquivarase.

Toda persoa que rexistre unha QSP deberá identificarse no sistema, polo que non se admitirá ningunha suxestión ou queixa presentada de forma anónima ou que non permita identificar a persoa interesada. Os seus datos permanecerán no anonimato e só os coñecerá a unidade administradora do sistema, agás que expresamente indique a súa conformidade para que os coñezan a unidade que vai responder a súa demanda ou parabén. En todo caso, deberá respectarse o previsto no artigo 4.3.

As QSP poden ser individuais ou colectivas. Neste último caso serán rexistradas por unha persoa representante e deberán achegarse os datos de identificación de todas as persoas interesadas. As actuacións a que dean lugar efectuaranse co ou coa representante que expresamente se designase ou, se for o caso, coa persoa que figure en primeiro lugar.

A QSP debe ser o máis concreta posible: indicará as datas e as horas nas que se produciu a incidencia, e precisará ao máximo posible a descrición dos feitos evitando declaracións xenéricas.

Os datos mínimos necesarios para tramitar a QSP son tipo de incidencia, tipo de usuario/a, unidade destinataria da QSP e idioma preferido para a resposta. A persoa usuaria pode achegar a través da aplicación informática calquera documentación que apoie, fundamente ou complete a súa QSP.

Despois de enviar o formulario, os datos quedarán rexistrados na aplicación informática. Ao entrar no sistema informático, a comunicación recibirá unha referencia co formato QSP-XX/YYYY, onde XX son os dous últimos díxitos do ano no que se fai a comunicación e YYYY un número secuencial.

O sistema informático enviaralle unha comunicación ao correo electrónico da persoa interesada e nel indicaralle que a súa comunicación foi rexistrada no sistema, a referencia, hora de presentación, enlace onde pode consultar o estado de tramitación da súa QSP e o prazo de resposta.